Talofa gatama o Nanumea!

I te atupaipai i po nei, koa salalau fanau Nanumea i feitu e faa ote lalolagi.  Koa fakamakeke o lagona te leo i alatu o te fakkai, mana fai koa tapatapa penei — “Eeee, koa luku taatou i uta i te Ahiga — e tahi te moa, lua talo, tefui pi te fakaaua!”  Kae fui lagona te leo o te leoleo o te ttou fenua pele, me koa nonoho mao taatou, toko uke o taatou koa noho i fenua ake, i tua o Nanumea.

Telaa la, te fakatau vaivai mai ikonei, ee aa, e mafai ai tatou o luku penei, ite internet, mo faitala pelaa ailoa i uta i te Ahiga o te ea?

Manatua – te Ahiga o taatou i uta i Nanumea ko te fale o muna.  I loto ite fale mo ona pou mo ona nohoaga koa maifai ai taatou o fakaali manatu mo mafaufauga, mo loto o kaaiga mo tino taki toko tahi.

Te “space” ikonei e pelaa me mo mea loa a taatou.   Eaa?   E llei te manatu tenei?   E mafai ai taatou o fakaaoga he fale i te internet, he Ahiga mo gatama Nanumea koa salalau i te lalolagi?

Fakali oulua manatu ikonei! E fiagofie — click on “Comments” at the top or bottom of the page, put in your name and email address, type your comment, then click “Submit” to post your comment ki te Ahiga!

Fakafetai, kae ke manuia te po mo polokolame koa faka toka!

Kiti mo Ane

___________________________________________________________

Here are some early comments we have received on Nanumea.Net:

Talofa koulua Kiti mo Ane,

Fakafetai mo te lua meli tenei, kae tafahili ko te lua moemitiga tela ni kamata mai i te 1973 ke oko mai ki te po 03 Novema 2008. Koa kaatoatoa te pouloto o te “pouless Nanumea Ahiga” tenei tela ko te Nanumea website. Fakafetai lahi`kii koulua mo te lahi o te lua galuega ki te Ahiga (website) a tatou. Moi ni heai te lua loto Tefolaha, penei e heai he “ahiga” penei a tatou. Penei hoki koa gagalo atu a foliga gagali o Nanumea nateaho, konei koa toe lavea e tatou i lua taumafaiga. E he gata te fakafetai a maua mo Ela kia koulua mo gatama i te uke o lua taimi fakamaaumau ki te “ahiga” tenei a tatou.

A Ela e lifu me ko lavea e ia a ata o te kaiga o latou kae koi foliki `kii latou. Kae ko aku la e heai ni ata o matou me i te aku e noho i Motufoua i te taimi tela, kae ko oku matua e noho i Nauru. Kae ko toku gafa tenei koa iloa e aku mai luga i pepa gafa kona ni fakatoka e koulua.E iai ni mea e tutupu i konei, ko fakailoa atu. Ke manuia koulua mo gatama.

Siliga mo Ela Tala

_____________________________________________

On Wednesday,Nov 5, 2008 at 11.35 AM, Lepeka Tavita Matulo tererei.eija.judy@gmail.com wrote
Fakafetai lahi lahi kii e Kiti mo Ane pela mo fanau katoa mote  www.nanumea.net ne fakatoka ne koulua e manatunatu ai tatou ki tou tino nateahoo. Fiafia kii te loto nei mo te lua fakatoka gali kae tafahili ite taua ki loto o tagata Nanumea katoa konei e salalau i feituu e fa ote lalolagi.
Kae tenei loa au e taumafai ke maua atu ne tala mai konei.
Fakafetai lahi toe fetaui
Lepeka Tavita Matulo
______________________________________
Talofa Kiti mote kaiga katoa,
Fafetai mote meli gali kii tenei kae maise ailoa ko tala gali pena hoki mo tau moe miti. Tena tonu ailoa te uiga ona koa uke mea koa manakogina ke taviligina kae titi  kiloto ite fale tenei.Ko toe fakahoko atu fakamuli ona pela e tai he lava tonu taimi mote taimi tenei.
Manuia katoa gatama Nanumea i otou fakamoemoega

Mila (Amilale)

_____________________________________
Kiti
Fakafetai lahi mo tau galuega taua kii tenei. Ke malolo galuega ko fano au o pula i au mea fou kona ne faopoopo ki loto i tou website
Ke manuia te aso ite alofa ote Atua
Malie (Lototele)

______________________________________

On 11/3/08, Fakavae Taomia <fakavae.taomia@fspi.org.fj> wrote:

Talofa Kiti mo Ane

E avatu eiloa mai konei te fakafetai lahi lahi ailoa mote website fou tenei ne faite ne koulua mo Fanau Nanumea.  Ko oko ailoa te aoga maise ki fanau kola e noho i fenua itua atu o Tuvalu kae maise Nanumea.

Kote Atua ke fakamanuia atu a Koulua kae maise te Kaaiga mote galuega lei tenei ko matea atu ki mata.

Fakafetai lahi mote avanoaga.
…………………………………………..
Fakavae Taomia
Fiji Islands
Phone: (679) 3312250; Mobile: (679) 9927628
Vision: Together we build communities in the Pacific
Website:  www.fspi.org.fj

________________________________________

From: Popeieta Ato Raponi <pope.raponi@gmail.com>
Date: Nov 3, 2008 5:49 PM
Subject: Te Fale (Website) a gatama Nanumea – Nanumea.net

Mauri Kiti mo Ane,

faka-talofa atu kia koulua pela hoki taina nanumea ite lalolangi.
fakafetai atu mai konei i Tarawa mote mail. Kaati he moemiti tonu tela ke hoko atu gatama Tefolaha ite website tenei koa oti ne fakatoka ne koulua ma gatama a Tefolaha. Ite vaitaimi nei pela koa fkotioti a polokalame ate motou akonga. Kae ma manatu mo toku tangata ko Lefulefu ke ma pukengina ata o tino nanumea katoa e ma iloangina ikonei, koa faulu atu kite web kote mea ke pula nisi fanau nanumea kote mea hoki ke pula i olotou kano mai konaa. Te manatu e tahi mafai e tonu ke tuhi a ingoa o head of households mo olotou gatama koa faulu atu hoki kote mea ke hoko te gafa kolaa koa oti ne fktoka ne koulua.
Moli atu te fkfetai mai i fanau nanumea ikonei i Tarawa mo ata. koa oti ne kave ata o nisi tino kola heai ne olotou computer i olotou fale. Koa oko ite tangi o latou ite pula ki olotou ata mo olotou matua. mahaninga i aso kola i tafa o matua. tela fkfetai kae fkmaloo.
kaati kona mua mai konei.
alofa atu kia koulua pela hoki fanau nanumea…

Pope

___________________________________________________

Talofa Kiti

Fakafetai lahi lahi kii mo te galuega gali ki te fakatelega o gafa. Nei koa iloa mene hau mai fea a matou mai te feitu o Fomai (Malua & Filifau) mo te feitu mai toku matua Faatasiga (Tauila & Taiafiafi).

Maua mo Sagaa mo tamaliki e malosi katoa.

Alofa atu

Eli (Malua)

Advertisements

40 responses to “Talofa gatama o Nanumea!

  1. Talofa Kiti mo Ane,

    E agaaga fakatahi mai konei ite fakafetai me koa taunu te fakamoemoega tela ni avake e koulua mo Siliga ite 2007 ia Oketopa ite taimi ni faitala iai tatou iko i Aukilani ite tauhaga tena.

    Pope e lago atu ki tou manatu ke fai mai e koulua mo Lefulefu a mea kona ke lavea atu hoki tou kau i kona, kae ko taumafau atu hoki au mai konei o puke ata i po lahi ikonei o kave kia Kiti mo Anne.

    Metiu

  2. Talofa Kiti/Ane pela hoki taina Seilona,
    fkfetai mote mea penei koa fkhoko tatou katoa gatama a Tefolaha. Ia pela nei mo tala ite motou fenua tenei ko Tarawa. e iai nei ne tahaonga a fenua katoa i Kiribati e fai ikonei. E fai tele i lua tauhanga. Tahaonga valevale i tafa pela mote soccer, basketball,… pela hoki iloto ite fale table tennis… mo tahaonga fk-kiribati te ano.
    Ia tali atu kia te koe Metiu, ke puke ata o matou mai konei, ke pula hoki koe i ata ou solonga ikonei, heni solonga tokouke he !!!.
    kaati kona mua mo tala mai konei, ke manuia tatou katoa.
    TEFOLAHA TOU HOA !!

  3. Talofa fanau pele a Nanumea ko Kiti mo Ane ite igoa tapu ote Aliki.

    He mafai o gata e fiafia ote loto mote lua loto mafi ki tulaga e mafai ai o avake a te igoa o Nanumea ki luga. E pela mote kupu ate toa tokotahi o Nanumea penei.

    Nanumea e he takua i toku loto e mahei.

    Tela la ke fai te kupu tenei mo fatu taua iloto o fanau katoa salalau o Nanumea.Toe pula ake me mafai o toe avake te fapaologa ote tou falesa i Nanumea?

    Kaati tena te manatu mai konei,ke manuia koulua ite alofa ote Aliki.

    Lepeka.Matulo

  4. Talua Tuia Tema

    Talofa Kiti mo Ane
    Fakafetai lahi atu loa kia koulua mo te website tenei ne fai ne koulua mo gatama Nanumea kae fakafetai hoki loa ko lavea a ata o tino mua o Nanumea pela hoki mo te fakatelega o gafa tenei koa iloa atu nei te telemaiga o toku gafa

    Fafetai lahi
    Toe fekite

    Talua Tuia Tema

  5. Talofa Kiti mo Ane pena hoki gatama salalau nanumea ite lalolagi.
    Fakafetai Kiti mo Ane mote website tenei ko mafai o lavea atu a foliga o tou tupuna nateaho, kae maise iai kote luku fakatahi tatou gatama Nanumea ite website tenei.
    Ia pela me he uke atu a mo muna mai konei, kae ke manuia loa polokalame koi toe ote aso maise iai sukega e fakafeagai mo gatama ite fakaotiga ote tauhaga, ke ola te fale
    toe hepaki fakamuli

    ofa lahi atu
    Milo

  6. Talofa Kiti mo Ane.

    Fakafetai kae fakamalo mote ahiiga tenei ko toe mafai ai o hepaki fanau Nanumea i feitu valevale ote lalolagi.

    Popeieta, ko gali kii te manatu tena ke fai katoa i sose momea e iai ai fanau Nanumea, ke pei a ata kae ke fakahoko io fakaopoopo ki ata o matakaiga ote 1974.

    Kaati mai Australia nei ke oko kite Po Tefolaha ko taumafai o pei a ata o fanau Nanumea ko avatu la.

    Ke ola te Fale.

    Lomiakoka.

  7. Malie Lototele

    Ko fakatalofa atu matou mai Suva nei.

    Ko ava tu ne moo tala mai konei ite motou feitu. matou nei e fai te motou BBQ ite po ono ite fale o Satini. te pogai ote mote BBQ o fakamavae ki fanau Nanumea kola ko graduate ite tauhaga nei mai olotou akoga. Tou gatama e fakatautau ke oti ite tauhaga nei konei – Sipele Samuelu, Timi Melei mo Tipelu Kauani (USP. Kaumaile Manuella, Paama Saamu, Sinapi Eitini (FIT). Taumili Makaata (FSM) mo Senilau Kulu iai mai te Lautoka Teachers College. Te BBQ e fai fakatahigina ne tagata mo fafine nanumea galue i Fiji nei pela hoki mo fanau akoga kola koi foki mai ite tauhaga fou. Ate amiga e fakaoko hoki ki fanau i loto i secondary mo primary schools i luga i Fiji nei.

    Ko alofa atu matou

    Malie Lototele

  8. Talofa Kiti mo Ana ite alofa te Tamana ite lagi.
    E avatu te tai lahi mai konei mote manatu gali ke fai he web te Fanau Tefolaha i tela e mafai ai o feiloai titi mafau2ga io me share tala etc…ia kae maise te f/tai e uiga loa mo fakahologa kona ne fai ne koulua..au e very very happy and excited to see igoa oku tupuna, sologa ite feitu toku matua tela e hau ai toku feitu Tefolaha…he mea gali kii ke iloa ne kita ko ai a kita mote koga ne hau ai a kita ne…especially since e he iloa tonu ne toku mum her Dad’s kaiga as he passed away koi foliki a ia…so taa for the gafa kaait e fia2 lahi hoki a ia ke tai lahi io me katoa2 te iloa ne ia tena hauga pela mo au ne lahi fenua fakaatea…so great work and thanks mote web tenei mote lua taimi mo mea tou fenua tena ko NNMA…tiiga te tupu ake fenua ake he mafai o galo ite loto ite kita he fanau Tefolaha so tumau te fakamalosi ki mea e avake ai tulaga tou fenua pele tena ki luga io me ki mua…Congrats to all our graduates and Best Wishes mo aso mai mua, kae toe tao atu te tai lahi mo otu taimi Kiti ,Ane and Fanau. God bless. Ia, ke uke mai ata tino Seilona i so se koga…
    Alofa atu matou

    Favae Herman

  9. Talofa hoki Favae, kae fakafetai ailoa mo au muna gali! We are so pleased that our site is of some use — we learned a lot from the elders, and it is time to pass it on, which we are trying to do.

    Please send us an email and tell us where you are and a bit more about your family, etc.

    Fakafetai! Kiti mo Ane

  10. Lefulefu Kelese

    Kiti/Ane
    Talofa koulua pela hoki mo fanau a Tefolaha konei e salalau i te atupaipai
    Fakafetai me e malosi katoa te motou kaiga mai konei te fakatau kaati e pena katoa mo kaiga Nanumea i luga i Tarawa nei ia mo koutou hoki taina mo tuagane mai tua ikona.
    E llei me ia Pope tenei e na update gina koutou ki tala mai luga i Tarawa nei ka ko aku, ko tala mai fenua i tua (outer islands) me ia te au nei e tai mataleva o noho i te fenua e tahi ko Tabiteuea. E iai he falesa o te motou lotu (lds church) tela e kaufakatugina ikona. Tenei e taumafai au o puke atu ne mo ata ke lua laveagina a mea e tupu mo te olaga i fenua i tua penei.
    Ia, pela mo te ma manatu mo Pope ke puke ake a ata o households katoa o tou kau Nanumea katoa i luga i Kilipati nei kae post atu ko te mea ke lua laveagina mai kona ko te mea hoki ke lua iloagina me e tino/kano koulua mo tino kona io me ikaai. Gali kii hoki te galuega a Kiti/Ane me ko a mafai e tatou o trace a ttou gafa i te geneology link ne fakatokagina e laua.
    Kaati kona a mo tala kae ke manuia katoa tatou i tona alofa.

    Lefu & kaiga

  11. Talofa tatou katoa gatama Nanumea,

    POPEIETA MO LEFULEFU- He fekau kia koulua. Fakamolemole koulua ke fakahoko mai ake e koulua mai kona a fakahologa o motou tino kona i Tarawa. Pula ki te pepa 23/-2 o Geneologies, i gatama a Hautia mo Neikai- fafine: Masaleta, Teingira, Otopina, Tufosa, Soala mo Kaipea mo te tama tagata iai ko Kaua. Fakamolemole e maua e koulua o tuhi mai ake a igoa o gatama a latou kona, pela hoki mo lou mokopuna, moko..

    Hili atu i te gali mana maua ni lou ata ke lavea atu latou.

    Koa oti la aku ni feiloai mo gatama o motou hologa kona i Tarawa kae koa noho tumau nei i Aukilani, kae ko te fakalavelave ko taku gana Kilipati ko te gana tela nateaho, e he maina iai ou tagata. Tela la, e he maua e latou o faka maina mai a hologa o matou i kona i Kilipati.

    Fetaui,

    Siliga Tavita Tala

  12. Michael & Lina Batty

    Talofa Kiti mo Ane .

    Fakafetai lahi mote lua moe miti gali mote galuenga malosi a koulua o fai he website penei mo gatama Nanumea. Koa gali aka loa me koa maua he avanoaga o fetaui mo gatama Nanumea e noho salalau i feitu e fa ote lalolagi. Kae koa gali hoki me koa maua he avanoaga mo gatama Nanumea o tukutuku ne manatu lei mote avakega ki lunga ote fenua pele ko Nanumea i auala lei mo tupulaga o tatou i aso mai mua.

    Matou mai New Caledonia nei e tolu mata kaiga fanau Nanumea.Te kaiga o maua,te kaiga o Afesoi, mo makopuna o Semisi. Koa oko ailoa au ite ofo, kae lifu hoki i ona tafa me ia ne tino Nanumea ikonei.Ite ma galuegaga i Solomon Islands mai mua ote ma omai ki konei e iai he motou potukau a tino Nanumea tela te napa o ia e hilia atu ite selau a tino iai. Kae pula au ki tino Nanumea ikonei kaati la pela me lima sefulu tupu.Koa oko ailoa ite gali aka kia matou me koa iai he taimi o matou o tavili faka-Nanumea mo gatama Nanumea, kae maise aku tama o iloa ne latou te gana e Nanumea pela hoki mo tu mo aganuu o Nanumea.

    Kiti mo Ane fakafetai lahi lahi mote website tenei.Matou nei koa noho i New Caledonia. A matou ne oko mai ki konei ite po 30/11/08. Tenei au nei mo taku tama tagata ko Siaumau foliki e akonga keiloa ne maua o tavili faka-Falani me heiloa ne maua kae ko tino ikonei he uke e tavili faka-palagi me tavili ailoa faka-Falani. A taku avaga mo ma tamaliki fafine e mahani kii ite tavili faka-Falani mene tauloto ailoa mai Egelani. A gatama hoki Nanumea ikonei koa ailoa ite mahani ite tavili faka-Falani.Tenei latou e fesoasoani mai ite gana pela hoki keiloa ne matou atu mo aganuu ote fenua tenei.

    Ko alofaatu matou katoa gatama Nanumea kia koulua mote lua kaiga pela hoki kia koutou katoa gatama Nanumea salalau. Ke manuia tatou katoa ite alofa ote Atua.

    Toe fetaui atafa,

    Lina mote kaiga. X X X X X.

  13. Ke manuia te Kilisimasi mote Tauhaga Fou….

    alofa atu mai konei…manuia polokalame fai o polahi…..

    Milo

  14. talofa katoa koutou!!!

  15. Talofa Gatama Tefolaha,

    Koa heke ki tua te Kilisimasi kae ni manuia katoa faiga-mea a matou i Aukilani nei. Ko toe avatu a fakamanuiaga o te po o gatama a Nanufuti (alanei, po 26/12/08), Tauhaga Fou, Po Tefolaha mo te haelega o tatou i loto i te 2009.

    Tala o matou i konei, i te Po Tapu tenei ni fanatu (po 21/12/08) ni lotu tahi matou katoa a Ekalesia kola ulu i lalo o te EKT, fakatahi iai mo kaumalaga e lua- Kaumalaga a te Aulotu mai Nukufetau mo te Kaumalaga a te Aogapehe mai Funafuti. Ni fakatahi mai hoki ko te Ekalesia Niutao (ka he ulu i lalo o te EKT) mo te Ekalesia Asofitu. Te Lotu tenei he lotu e fakamanatu iai te katoaga o te tauhaga muamua ni tu iai te Ekalesia Kelisiano Tuvalu a Vaitupu i Aukilani, tela hoki e ulu i lalo o te EKT. He fuafuagina te gagali o te tau pehe ni fai i va o Ekalesia e ono mo kaumalaga konei e lua.

    Ko te Po Tapu tenei mai mua (po 28/12/08) e lotu tahi hoki a Ekalesia katoa konei e ono mo kaumalaga e lua, kae host te lotu a matou tenei e te Ekalesia Asofitu. Tela ko lavea e tatou i konei a te galue tahi o Ekalesia a tatou konei mo te Ekalesia Vaitupu.

    E iai ni hui Talavou mai te Ekalesia o tatou tenei e faifeaugina e Rev Suamalie Iosefa e takigina e Fala Haulagi ki Melbourne. Australia mai te po 3 ki te po 9 o Ianuali 2009. E toko ono latou:

    Fala Haulagi (Takitaki)- Nanumea
    Kimaata Malua(Hui)- Nanumea
    Lester Malua (Hui)- Nanumea
    Kabongnga Mauatu (Hui)- Nanumea
    Lotonui Iosefa (Hui)- Nukulaelae
    Penina Tala (Hui)- Nanumea

    Ko Lester e tai fakalotolotolua tena fano me e he mautinoa me oko mai tena passport fou mai Tuvalu io me ikaai.

    Te motou Po Tefolaha i Aukilani nei e fai i te po 09/01/09. He fuafuagina te gali o polokalame a matou.

    Kiti, konei matou e taumafai ke avatu ni ata i faigamaea a matou i konei. Ko fakamolemole atu hoki aku kia tatou konei i Aukilani nei ke fakaoko kia Kiti mo Ane a ata gagali a koulua kona ni pei i faigamea a tatou.

    Ke manuia tatou katoa,

    Tefolaha Tou Hoa.

    Siliga

  16. Correction:

    I taku posting tena ni to avatu, te EKALESIA VAITUPU i te palakalafa tolu e tatau o faitau pela, “EKALESIA ASOFITU”.

    Siliga

  17. Talofa Taina Nanumea
    Koa fai atu mo tala mai konei i Kiribati. E fia fakailoa atu mote ngalo o MELIVAI TAULIALIA ite po 23 Dec. 2008. Ia matou mai konei ne fkmanatu te Po O Tefolaha e tolu aso. Konei koa post atu ata o matou katoa kola ne fktahi atu kite aso.
    alofa atu kae ke manuia te tauhanga 2009.

  18. Silinga,
    fkfetai me koa maua e aku tau tuhi mo te fekau. koa taumafai atu aku o fai tau fekau. Matou mo Teingira mo tona kainga mo ona mokopuna ite asopati. Kae lei me noho tahi mo tama a Kanava ite manafa e tahi, e lei hoki ke fkoti atu tou ngafa i konei. He he ngafa ite tokouke ikonei.
    alofa atu

  19. Malie,
    koa tuhi atu he tuhi mai konei. Fakafetai mo au mo tala mai kona ite lua mata-hauma e uinga o lua gatama kona koa oti a laa taumafainga. Mai ite taipola o Nanumea ilunga i Tarawa, fia fktahi atu matou o fai atu he congratulations kia laua konaa koa graduated. E iai koia he muna e mahani o lagona ite ahinga mai gutu otou toeaina. ” A mea katoa e faia ailoa katoa e te loto. Kae nui te putinae a mea katoa ne mea e heai” Fkmaloo kae fkfetai koa fai laua kona ne oti a laa akonga he mea ke pula kiai te tupulanga o taa fenua mo aso mai mua. fakafetai!
    TEFOLAHA TOU HOA.

  20. Kiti,
    Fakamalo kae fakafetai mote haga lahi ne fai ne koulua mo tupulaga gaholo ote tou fenua pele ko Nanumea, kote mea ke katakata, lilifu kae maneanea hoki , koa malie te loto mote agaga aua koa tu mahavinavina te ata ote ta fenua mo ana tala ite fafenua ote lalolagi. Kae maise loa oku fakamihimihiga kite ata o oku tupuna koa Laiti pela hoki Takitua mo Suana i Loluafou.

    Fakafetai lahi, ke manuai te aso.

  21. Malo Ane & Kiti mote haga lahi kite faiga ote website a nanumea. Ko alofa atu hoki mai konei i Suva nei.
    Ke manuia katoa tatou fanau a Nanumea…

  22. Mauri Taina Nanumea,
    Ia, mo tala mai te motou fenua nei. Ia, e fia fkiloa atu ona kote mate o Taumaia Iosefa ite polima 13 Aug.2009 kae ne tanu tona foitino ite pomauli pongipongi. Tona foitino ne tanu fktahi mo Navahine Folaha i mo mea o Tetika mo Talialofa. Tona mate ne kulasi ite pasikaiti mote pickup, e pili mote Bonriki Airport. Kaati kona mua mo tala mai konei ite motou fenua.
    alofa atu matou katoa kia koulua mai kona.
    pope

  23. Talofa Kiti mo Ane

    Fakamalo atu mote haga lahi kae taua ki fanau salalau o Nanumea me ko iloa katoa ne latou mo mea ne hau ai aia. kaati ko heai hoki mai konei kae ko alofa lahi atu kia koulua mai kona.

    Hina

  24. E fakafetai kae fakamalo atu mote hala lagi ne fakafeagai mo koulua Kiti/Ane.
    Fakafetai hoki ki fanau Tefolaha mo tufaga fesoasoani ko mafai ai o fakafaigofie te galuega

    Ke tupu ola te fenua
    toe fekite..
    Taupale Maliga

  25. Taupale Maliga

    Fakafetai kae fakamaloo mo te haga lahi ne fakafeagai mo koulua Kiti/Ane.
    Fakafetai hoki ki fanau Tefolaha mo tufaga fesoasoani ko mafai ai o fakafaigofie te galuega

    Ke tupu ola te fenua
    toe fekite…
    Taupale Maliga

  26. Filipine. Haulagi

    Talofa gatama Seilona pena hoki Kiti mo Ane mote kaiga. Ia e Ane mo Kiti fakamolemole eiloa e iai ne lua ata ake mai tua ifo o ata a koulua konei??. Ia fakafetai kae ko alofa atu kia koulua mote kaiga mai kona.
    Mai ia matou i konei i Ausitalia.

    Tofa mua

  27. talofa tamaliki nnmea katoa ko oko loa te gali ote wbsite tatou tenei kaati laa e fkfetai tatou kia Kitty mo Ane mote fktokga tena…………

    ko alofa atu mai konei i nnnmea ke manuia katoa loa koutou

  28. Talofa katoa loa gatama Nanumea salalau.

    E avatu te fakafetai pafuefa kia Kitty mo Anne mote haga lahi tenei ne fai e laua.

    Ko alofa atu mai te matatala o maua mai Suva….

    toe fekite

  29. Kasia Pulusi Tiliga-Smith

    Talofa Kiti mo Ane mo lua fanau , pela hoki mo fugahele o Nanumea salalau i feitu e fa ote atupaipai. Ko fai au mo hui o matou ikonei i Wellington o momoli atu o motou alofaga mo fakamanuiaga kia koutou katoa. E fakaali toku lifu mo toku fakamatamata ona ite gali ote ahiga o Nanumea tenei ne fakatu ne Ane mo Kiti mo la moemiti i gaahologa o muna tukutuku mai i mokopuna o Tefolaho salalau. E avatu te fakafetai lahi kii kia koulua e Ane mo Kiti mo gauega gali a koulua ne fai mote fenua ko Nanumea. E fiafia te loto me logo aku i toku tamana (Dr Tiliga Pulusi) me ne fai atu ke fai te lua ‘research’ i Nanumea. Telala, fakamalo lahi atu mo lua moemiti gali koa hae mai iai a ” Heirs of Tefolaha”. E uke aku muna e fia fai atu kia koulua e Ane mo Kiti mo fua o lua galuega ne fai mo Nanumea but right now I’m getting too emotional and would like to say thank you once again from the bottom of my heart. Tala ote motou fakakai ko Ueligitone, ko hau loa te mafanafana i aso nei. Ne fai te fakaala a matou ite Labour Weekend (26/10/09) tela ne fai iai te fakataufaiga i tahaoga valevale pela mo lami, fakatotolo, domino, futipoolo mo nisi tahaoga ake mo tamaliki foliki. A pea hili mo tino tokotahi pela hoki mo putukau e “final” ite Po o Tefolaha, kae failogagina. Matou e iai he motou “shield” ne carve gina ne te avaga a Lili Masipei, Temahe mai te Black Totara tree, age 180 yrs old mo fakailoga te Po o Tefolaha. Te kaufale tela e maopoopo/kau fakatahi i lotou fakafiafiaga gali mo te aso tena, tena te kaiga e puke ne ia te shield. Ite tauhaga nei 2009 ko te kaiga o Senimili mo Laipe Kanipule ne olo mo latou te hili. Ko tupe lafo ki items o matakaiga e fano kite Trust Fund mo Mokopuna o Tefolaha which has just started this year. Nei la ko oko ite fakatokatoka o matakaiga i olotou fakatoga mo te aso mai mua nei ona la koa iai he mea e fakataufai kiai ke maua ne latou. He taimi ko scan atu te ata ke pula koutou kiai. Kaati ko lava mua u nei tatou faitalaga, kae ke tumau ia tatou te loto fealofani mote loto lagolago faikimua kia tatou katoa fanau o Nanumea. He maua o gata te loto fiafia ona mote avanoaga gali penei ko mafai iai tatou faitala i galueluega o tatou communities Nanumea salalau ite universe. Tofa mua kae ke manuia katoa tatou ite Alofa tauanoa ote Tamana ite lagi. Ke manuia.

    P/S Moli atu alofaga o Tiliga (in hopital at present) mo Peleise kia koulua e Ane mo Kiti mo lua fanau.

    K. Tiliga-Smith
    C/- PNG High Commission
    279 Willis St
    PO Box 197
    Wellington. NZ

  30. Tefolaha tou hoa
    Talofa Kiti mo Ane mote fanau pele pela hoki mo fanau nanumea salalau. Ko toe fakahoko atu hoki ne mo manatu mai konei kae muamua loa o fakafetai tatou kite alofa ote Atua ko mafai ai o maua he avanoaga penei ko mafai o fepaki tatou i luga i mea a palagi konei..
    Kae maise hoki ai te fakafetai kia koulua fanau nanumea ko Kiti mo Ane mo te haga lahi tenei ne feagai mo koulua ite fakatokaga te auala faigofie tenei ke mafai ai fanau nanumea o fakaali a mafaufauga mote noho lei kae maopoopo o fanau o nanumea i feitu e fa ote lalolagi
    Au kooko loa te lifu kae fakamatamata me ko hae taua fanau nanumea i loto i fenua e 8 o Tuvalu ona kote website a gatama a Tefolaha
    kae ko mafai hoki ai taua o toe pula ki tua i ata o tou matua kae maise ai koou foliga itau folikiga.
    Fakafetai lahi . GOD BLESS YOU
    Ke manuia te Kilisimasi mote Tauhaga Fou.
    Toe Fetaui kae tofa mua

  31. Mo jequo n talofa te tutonu gali tenei Fanau Tefolaha/Seilona i feitu e fa te atupaipai…e mua loa vikiga tavaega mo Tamana ite lagi mo tausiga alofa kia tatou katoa ite tauhaga tenei koa fakaotioti…ia e fia fai taimi nei mo fakaoko atu kia koutou katoa alofaaga he laufia o matou tama Nanumea i Nauru kia koutou katoa ite kilisimasi mote tauhaga fou…ia ko gali te ahiga nei o tatou ko mafai ologo tala atu faifaiga mea a gatama Tefolaha salalau ite lalolagi…the world’s has bcm smaller n more closer bcs of this blog…thanks for all who’ve dropped in here n especially to you Ane mo Kiti tama fugahele a Tefolaha/Nanumea…this saying comes to mind as I peruse thru this blog…”hio, ko he fuagin, he pulafeia te gali te ahiga tatou tenei!” …telala e Ane mo Kiti toe taotao atu te fakafetai lahi mote lua galuega lahi ne fai ke foliga te moemiti tenei mo gatama Nanumea i sose koga ote lalolagi…ia pela mo tino katoa ne help out to make this dream a reality…ia here’s wishing u all Tefolahans out there, family n friends etc. n especially to you Ane, Kiti n Family, a very warm, loving, enjoyable, peaceful n safe Xmas n a fruitful New Yr ite alofa tou Aliki Fakaola Iesu Kekiso, the Reason for the Season…tofa la n God bless u all fellow Nanumeans….

  32. mai Amkatuku te akoga fakakauvaka ote Atufenua Tuvalu… ko pili mai te po kote Fulihaga Fou io me koe Asopati io me kote Po ote Folaha…. ia matou ikonei i Funafuti.. ko leva ne kamata a tahaoga ano ite mainland tela ko kau mua loa kote Labour Power mote Tuifitu i vaa o fafine mo tagata.. kaia? ite aku eloa ona ko tulaga o galuega fakafeagai atea hoki ko au tokotahi i taku department heai hoku assistant tela e mafai au o oko ki tahaoga ano ite fakai ite weekends kae ite lahiga o week days au e noho loa i Amatuku, nei ko oti ne oko mai te malo mo he fanau Nanumea galue ite malo me ko talia ke malolo ite polima tela kote po 08/01/2010, ka he maua nei te motou polokalame mote aso kae talitonu au kaati atafata ko maua kae maise kote lotu fakapitoa tela e fai ite pogipogi ote polima tena e taumafai ai matou mo Leota Sio (Chief Engineer), Puanita Iosia Taomia (English Teacher), Tausala Ligitasi (HEO Prime Minister Office) mo au Wilson Petio Kaea (Chief Catering Instructor), kote loto tonu loa o matou ke kau fakatahi atu matou ki faigamea ote Po ote Folaha, ko toe avatu hoki loa ikonei ki gatama salalau ite atupaipai kola e fakatahi mai ite toeu website nei… alofaaga mo fakamanuiaga me kote po tonu loa o tou tupumaiga kola ko he oko mai kite po nei… kae ne fai ne latou ke fai mo po e manatua ai ne tatou konei ko fakamanatu ne tatou i ona po nei… me ko maina kae malamalama tatou ite Alofa ote Tou Tamana ite lagi i ana fakahoahoaaga ki tou olaga i feitu kehekehe kae maise la ki matua pele ko Kiti mo Ane mote manatu mafaufauga gali kae lei, ke tahi tatou i sose taimi e fano koe ki loto ite Ahiga Nameana… ate loto koi fia fakaoko atu alofaaga mo muna hoki e uke kae fai pefea ko ta te taimi.. ke toe taotao atu loa ikonei te loto e he gata te fia faitala atu mo koulua taina,tuagane,matua,tamana,tupuna,tauhoa o sose Nanumea tela e manatua kae fakailoga ne ia te po o taua… fai mai te kau nateaho! Tefolaha Tou Hoa! io me ” Puhi Taku Muna Kae Kau Moeakigina”
    Manuia Te Gatama Nanumea salalau i feitu katoa ote lalolagi nei i Tou lua po lahi…
    mai ia matou katoa gatama Nanumea i Amatuku… Leota Sio, Puanita Iosia Taomia, Tausala Ligitasi, pela hoki gatama Nanumea konei e ulu nei iloto i Amatuku.. Course 81, Teuila Launiu, Teuila Taukai, Nafa Eitini.. / Course 82,Earnest Brown Tihala../ Course 83, Alipele E Teiti, Fasitua Fiavaai Falaile, kae maise maluga aku fakamanuiaga mote po o taua ke oko atu loa ki oku tauhoa kola e manatua ne latou au ite taimi nei… ko fiafia au ke tukutuku mai ne ou lua manatu ki taku filiga mo koulua i manatu fai ki loto ite ahiga Nameana.. tenei koi tali atu ki oko mai… ko tou lua taina tuagane tamana pele faka-Nameana iluga ite motu ko Amatuku… Manuyia! Wilson Petio Kaea

  33. Mauri Taina Nanumea,
    Koa tuhi atu o fkiloa atu te ngalo ote taina pele ko Iosua Manuao. Ne ngalo ite polima afiafi 1 Apelila kae ne tanu ite potapu 3 Apelila. Fkfetai aku te toeaina o Nanumea kia Iosua tona tiute(te failautuhi o Nanumea)mo Nanumea ilunga i Tarawa nei. Ia, koa fkmolemole atu ke fkoko atu te tala tenei ki taina katoa kae maise mo kainga o Iosua. Fkfetai hoki aku ki tou kau Nanumea kola ne oko atu kite fanoanoa, e lavea iai te loto fenua o tatou katoa o fesoasoani ki sose tino mo tona fklavelave. alofa atu mai konei i Tarawa.
    TE FOLAHA TOU HOA!

  34. Hi all and Talofa Kiti mo Ane.
    Au ne taumafai to meet with you guys on our way back from Anaheim on August 14, but you weren’t home. I left you a message on your answering machine and left as we had a long way to drive home.

    I have videos of Nanumea from 2008 on DVD that I would like to share on this website that might interest you. Let me know if you like to put it in here.

    Ke manuia faiga-muna ot fale a tatou.

  35. Talofa fanau pele i loto o tagata Nanumea katoa. Kiti Ane mote kaiga
    Faakafetai lahi mo te lua manatua mai gatama o Nanumea katoa konei e salalau ite lalolagi,konei ko mafai o fesokotaki ite website tenei.
    Kae tahi te fakamolemole kia koutou katoa kafai he tino e iloa ne ia te tamaliki tenei ko Teoti Matulo John Sommerhauser fakamolemole ko fakailoa mai ake la kia Matulo Kahifa.Fakafetai lahi

    Lepeka matulo

  36. Hiya all n talofa kia koutou Fanau Seilona salalau ite vasa sousou…hias sending u kaiga n takaga pele ite loto alofaaga he laufia ote Kilisimasi n famakamanuiaga te Tauhaga Fou ite alofa lahi tou Tamana faka te Agaga ia Keliso Iesu tou Aliki Fakaola. Ke fakamaina ne Ia tou loto n ala ite po tenei taua e fakamanatu ai te oko maiga te meaalofa he mafai ne tatou o taui a te Atua Maluga i aho mai mua te olaga. Malosi katoa matou Fanau Tefolaha this end n hope the same goes with u guys…iake manuiua hoki otou programme mote Asopati…May the peace, love, joy, light, faithfulness n grace of our LORD n SAVIOUR JESUS CHRIST be with u all this Christmas Season…

    Warmest Rgds n alofa to u all,
    favae n kaiga

  37. Bonjour,
    Je m’appelle Jean SOMANO. Au cours d’un séjour à Ouvéa, sur les plaques des 19 tués, il y a écrit: “Heiloa Ngalo”. Pouvez-vous me dire comment cela se traduit?
    Amicalement
    jeansomano@gmail.com

  38. talofa kae fakamalo atu kia K ITI MO ANE mote la galuega fakaofoofogina kae fakamalie loto kite faiga ose website penei koa maua ai he avanoaga ne fanau a NANUMEA salalau i feitu katoa ote lllagi o faitau kiei ko iloa ai atala ote fenua kae hili atu la ko tupuga mai o tatoufakafetai lahi
    koa maua hoki te avanoaga lahi mte fakaaloalo o faka talofa atu ki gatama katoa a NNNMEA I SOSE mo mea ote lllagi nei.
    ko matou fanau nnnmea i brisbane ehe loko tokouke,ke manuia fakatokatokaga mote fonolahi pela hoki te kilisimasi KOTE ATUA E ANA FAKATAUNUGINA FAKAMOEMOEGA KATOA toe fekite

  39. mchristopher75

    Talofa Kiti mo Ane, fakafetai lasi mote faiteega ne koulua se website penei ke mafai o faitau io me titi manatu a fanau Nanumea iei. Ko oko loa te gali ote faitau atu ki manatu titi iloto nei kae maise ko gafa kola ne mafai o maua ne koulua. Te fakamoemoega me ka kaufakatasi tatou fanau Nanumea ite fakagaligaliiga ote website tenei i tala mo ata a koulua i kogakoga kesekese kola e nofo iei tatou. Ko alofa lasi atu ki fanau salalau Nanumea katoa kae manuia fakatokatokaaga a tou fenua mote fono lasi iluga ite fenua tonu ko Nanumea. Ke manuia te aso kae maise ko fakamoemoega mote fenua mo aso mai mua.

  40. Kiti mo Ane, talofa mai koulua pela hoki mote fanau ke oko hoki ailoa mo Gatama Nanumea noho vaha.E maualuga ailoa a tavaega mo vikiga ote Tamana ite Lagi me ia tatou e ola katoa i tana atafaiga alofa.Fakafetai lahi lahi te Atua.
    Koa fakaali atu te loto fiafia o fakafetai lahi kii kite lua ‘Malu KIti mo Ane, ite tufaga gali kae taaua kii ailoa ne fai ne koulua. Koa mafai o iloa katoa ne matou a omotou tupuga naiteahoo loa. Kae fakafesili penei; ne fai ne ai? Ne faigina ne Kiti mo Ane, tela la fakafetai fakamalo mo tufaga lei ne faigina ne koulua mo Nanumea.
    Ko mo ‘tala mo taukiki mai ikonei ite motou feitu i Funafuti nei. E fakafetai me lei katoa ‘tou fenua Nanumea i luga nei.
    Ko Gatama Nanumea koa oti ne malolo atu ite tauhaga nei 2013, mai ite olaga nei ko te fanau pele ko Naama Temetiu mote Matua pele ko Katalaina Kokea.
    Kae he failoto tatou i tena pule faitokotahi, me pule ailoa te Atua i ‘tou ola.
    Koa gata mua unei, toe fakahoko atu i he taimi mai mua.

    Ke manuia tatou katoa ite alofa lahi ote Atua ite Lagi.

    Toeaina Nanufuti.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s